قناة رشد والنخاسين الحضارم ... في شعر الجعيدي

واااسفاه .. حضرموت ستباع في سوق النخاسة

من (رُشد) لاتسهني ياحضرمـــــوت الرشاد

لك ناس فيهــا يدسّــوا سمّهم في العســـل

حقــاً يقولــوا وبــــه مليـــون باطــــل يراد

وأحيان باطــل يقولونـــه بدون اي خجـــل

باسمـــك ينـــادون لكـــن الكلام الوكــــــاد

ينوون سحبــك على قاري بو أربــع عجـــل

لــمان (عمــــران) والا لاضواحي (مـــــراد)

هــذا هدفهـــم ويببغونـــه يتــم في عجــل

مــن بعــد بايسحبـون اولادنــا في الرقـــاد

قبــل ان يزجّــوا بهـم في ظلمــة المعتقــل

داعــش وماعــش عليهــم أوكلـت الاعتماد

في الشرح والدان والبرعـة وصــوت الزمل

منظومــة الظلــم والارهــــاب والاضطهــاد

تسعى تواري عـن الاعيــن بصيـص الأمــل

سـوق النخاســة لها فيه الف شارع ومـــاد

والفيـــن سمســار مـــن غيـــر البيع والدلل

لي ماهدفهم سوى بيع الوطــن في المــزاد

هــذا دخــل يـتــمــم البيعــة وهــذا نــــزل

مامنهم شخص راســـه للشــرف يـــوم نـاد

لي مايغني لبيــع أرضــه رقـــص أو طبـــل

مـــن خلف قزوين لمـــا خلف دولــة تشــاد

ماحـــد الى جنـــب جلّادة وقــف واعتقــل

الا عصابـــة وعصبـــة لو صبحنـــا رمـــــاد

باتحتفــل مثــل ما بالقتـــل بوش احتفـــل

لأبليــس باعـــوا ضمائرهـــم وباعــــوا بلاد

والدين باعـــــوه في لمـــح البصـــر بالهلـل

بـــه تاجــروا مثل ما تاجـر (علي والعمـاد)

بالبـــر والبحـــر والبُــــــر والذرة والبصـــل

والظلــم سمـــوه والقتـــل المنظــم جهـــاد

والنعي دبكــة وصرخـــات الارامــل زجـــل

والمحسن اللي فتـح في كل بنــك اعتمــاد

للخيــر خصصه. بـه يقضون كم مــن أجــل

أهــل العقــول المريضة بالقلـم والمــــــداد

ثبتــت عليهــم جرائـم قتـل في كل محــل

كم طفـــل يمسـي بسبّتهــم مشــرّد وشــاد

من منطقــة كان لــه فيهـــا مبــات ومظــل

والمُــــر جعلـــوه للمحتــاج مشــــرب وزاد

والحلــو مصّــوه ماخلـــوا لنــا شي وســـل

والجوع في عهدهم والسلب والنهب ســـاد

لا بــــارك الله في شــــــلة (علي بالقفــــل)

لي يدّعون انهـم مــن قــوم (صالح وعــاد)

طلعوا من أقوام (بن غريون) خبيث العمـل

شلــة خبيثـــة عليهــا يصعـــب الاعتمــــاد

الا في الكذب والغـــش والفتـــن والدّجــل

فوق أرض زينة شتهــرت بالسمُر والقتــــاد

والنخل والرّاك والصُـــر والسقُــم والقفـــلّ

ماقصدهم غيـر تشويـــه الرجــال الشـــداد

مثل الذي يختلق لك مـــن نجاحـك فشـــل

والجيش صبوا عليه أحقادهــــم بأجتهـــاد

ما سرّهم نصــره اللي يضربوا بـــــه مثـــل

رفضوا على مـــوت جنُده يعلنون الحـــداد

والا يدينــون لــو تفجيـــر فيهـــم حصـــل

ازعجهم النصـر وانجـاز الهـــدف والمــــراد

اللي تحقــــق على يدّات كــم مــــن بطــل

ماحـــد شغــل منهــم نفســه بظلم العبـــاد

هـــــذا بمنصـــب وبالدولار ذاك انشغــــــل

لعبــة حقيـــرة بها يلعـــب رمـــوز الفســـاد

كلن عليهــا مـــن اذنـــاب الزيـــود اشتغــل

فتنة وشق صـف واضح وانتقاء واحتشــاد

خلــف اي مشــروع لايبـدؤ لنــا فيــه حــل

ضحكو على اهل(المكلا) والعظيمة (سعاد)

والبـدو لي في بطـــون الأوديـــة والجبــل

باعلام فاشــل يــذر فــوق العيــون الرمــاد

والا مذيعيــن نــص في هرجهــــم مبتــذل

كلـه نكايــة في (البعسـي) وفي (باجــراد)

ماهي محبـة في (المهـري) ولا( بن جبــل)

لي يرتجي جود مـــن لي مابدأ يــوم جــاد

مثـل الذي يرتجــي ماطـــر يجي من زحـل

ماحــد يراهـــن يقولـــون العــرب ع جـواد

خاسـر ويعجـــز الي خــط النهايـــة يصــل

وآخـــر كلامي اذا نادى الوطــن ع الجهــاد

قبل ان تلبون حطوا في الوحــوش الهمــل

يامن لكم ع المقـص بصمـة وفــوق الزنــاد

والحـــرب فيهـــا لكـــم تاريخ منــــذ الازل

والختــم صلوا على لي مابدأ يـــوم اشـــاد

بالظلم واهلـــه كمـا شادوا خبـــاث العمـــل

شعر/ عبدالله الجعيدي .