قصيدة رثاءفي الفنان كرامة مرسال : غيّبت يانجم ساطع في سماء حضرمـوت

غيّبت يانجم ساطع في سماء حضرمـوت

والنور فجر الاحد بعدك تحـــوّل ظـــلام

تحزن عليك الصحاري والمدن والخبــوت

من خلف سيحوت للصفراء مدينة شبام

والنخل والعلب لي دومــه كما العنبــروت

والزرع والعشب الاخضر والسمر والبشـام

والجزر والمد في بحر العــرب واليخــوت

والديس والشرج والمنقـد وحــي الســلام

مات الذي مامعه في البنك خمسة سنوت

او يمتلك مــــن حطــام الارض حتى قــرام

مــــــات الــــذي ماتمنينــا مثيلـــه يمــــــوت

مــــــات التواضـع ومــات الطيب والاحتـرام

مــــات الذي صعب بأمثاله تجود الوقـــوت

حامــــل لواء أرثنا الشعبي وعــذب الكلام

مرسال لي كان صوته في جميع البيــوت

ينهم وصيته كمــا صوته يحن ع الــدوام

في كل ملّي كتــب اسمـــه وفي كل فـــوت

فوق ارض فيها قضى عمره رفيع المقــام

بس للاسف فيـه لا منظــر ولا بنكنــوت

عنده . تخلي جميع الناس فوقــه قيــام

فقره وقهره عليه اهل المظاهــر سكـــوت

مايـــوم شفنـــاه يحضى منّهـــم باهتمـــام

ماجبّروا كُسر من كانــت عظامـــه ربــــوت

او ضمــدوا جــرح ماخـــلا عيونــــه تنــام

لو هو من اهل الثياب الفاخرة والبشــــوت

بايصبحوا تحــت بيته ناصبيــن الخيــام

في ارض الاحقاف محروقة جميع الكروت

ماشفـــت واحــــد بهــا كرتــه على مايــــرام

لي مــا يخلــــون فرصـــة للمصالــح تفــوت

خلـــوه وحــده كمــا خلّــــوا كــوادر عظــام

دعواتكم في التهجــّد له وعنـد القنـــوت

بالعفـــو والمغفــرة مــن عنــد رب الانـــــام

هه

 شعر /عبدالله مبارك الجعيدي - الرياض