علي محسن الأحمر ... آخر الأنبياء المرسلين

حتى لو يشتونا نسمي علي محسن آخر الأنبياء المرسلين والا حتى لو يشتونا ندهف بأسعد الكامل – بكله - من التاريخ ونكشح بدله "مٌحسن الكامل" ما فيش مشكلة خالص والله ..

الضخم "علي محسن " أحسن واحد بالعالم .. وهو وحده رجل السلام العالمي ، والبقية كلهم سواقين أطقم عسكرية عنده .

علي محسن افضل واحد بالعالم واحنا عيال ستين ملعونة ، بس قولوا له ايحين عـ "يفرح الجُهال ويسلم الحديقة منسب يلعبوا.

يامنعاه قد نص الشعب فارحين ويشتوا يخلفوا منسب يودوا جهالهم حديقة عمهم " محسن " الله يحسن اليه ويرزقة " التبة " والجنة والحور والحوار والجوار وبقية الدنادح والأوسمة والدروع والقلافد كوووولهن له وحده .

هيا موعا نزيد نعمل ؟ نفرق لكم قيمة مقص يبسق به الشريط مثلا ؟

طيااااب والمقص عليا .

هاتي المقص من المطبخ يا اماه .. الضخم حقنا "شيصلي الفجر " ويخرج بعدها طوااالي يفرح الجهال .

ادعوا له ياجماعة ، الله يشلنا .. ويحفظه ضخما لنا وللجهال كلهم .. ولليمن وللأمتين العربية والإسلامية ولشرعب السلام والكل .. وكسروا لقف ابوه اللي يتراجع ...اهه.

* الكاتب اليمني فكري قاسم