قصة تحاكي الواقع الحضرمي : ‘‘مندري‘‘ (*) .. سرق عرستي

كيه هللوا ... اليوم عرستي استرقت في عز الظهر .. انا عارف ان الموضوع تافه بالنسبه لكم .. وبتقولون ياراجل  استرقت عاصمة محافظة  كامله معاد الا عرستك !! .. بس صدقونا طز في العرسة برغم اني من القهر متغذيت .. اللي يهمنا في الموضوع هذا الحرامي المجرم اللي محد قادر يوقفه عند حده .. سألت عيال الحافه من اللي كسر قفل ( الصندقة ) وسرق العرسه قالو على الفور ( مندري ) .. حتى صاحب دكان الخضرة اللي مقابل الصندقة اكد وحلف يمين قال : والله ( مندري ).. طيب ياجماعه ( مندري هذا انسي ولا جني ) لاعب بالبلاد والعباد ( شوطح )

يا عويله من شل الجوال حق المريض ساعة ما غيب .. ( مندري ).

يا ابني من اللي ( شعق ) كراسك حق العلوم .. ( مندري ) .

يا ابني ايش فيه اخوك يصيح من اللي ضربه .. ( مندري ).

( مندري ) هذا عامل لنا الكثير من المشاكل داخل البيوت وخارجها .. بس ياجماعة ايام زمان كانت الدوله كثيرا ما تلقي القبض على ( مندري ) .. وبسرعة .. اذكر اخر مرة سجن فيها ( مندري ) قبل الوحده بشهرين .. استرق اثاث بيت جديد لم يسكن بعد  لاحد المعارف .. وكل ما سألنا عن السارق .. قالوا ( مندري ) .. المهم تم ابلاغ الشرطه .. ولم تمر اكثر من 24 ساعة الا و( مندري ) قده خلف القظبان .. وما ان دخلت المنقا اليماني وبسكت ابو ولد من ( السده ) مع الوحدة  الا و( مندري ) قده  هرب من( الخلفة ) .

ومن يومها وهو حرا طليقا .. كل يوم بل كل ساعة يعمل مصيبه ويفلت من العقاب !! والان اصبح مجرم خطير .. يتقطع الطريق ويسرق الملاين ويقتل في عز النهار ويفجر ويغتال وينصب ويحتال .. ولا اكبر شنب في الحكومة استطاع القبض عليه !! ..

المهم وباختصار انا بغبت العرسه حقتي .. وعندي احساس بانكم بتساعدونا في البحث كلين من قداه .. صورتها قدامكم .. بس ركزوا تمام مكتوب بالحناء على بطنها ( هبه ) هذا اسمها طبعا ولا لها اي انتماء لا قبلي ولا حزبي وعلاقة لها بموضوع الهبه الشعبيه  وانا سميتها ( هبه ) لانها ( حرشه ) وكل اولاد الحافة بيحبوها .

بس اللي عنده اي معلومات يتواصل معي عبر صفحتي على الفيسبوك والحذر يتصل بالنجدة .. قولوا لييييش؟!.. لاني اول ما استرقت عرستي قلت بطرح بلاغ في المديرية .. ورحت الى هناك فعلا ، وعادنا الا واقف ع( المردم ) حق باب مكتب الفندم سمعته يقول لواحد من زملائه : من اللي شل ( الفنجان ) حق الشاهي حقي من فوق مكتبي ؟! تصدقون  ياجماعة من اللي شل فنجان الفندم حق الشاهي ( مندري ) .. هللوا .. قلت في نفسي شل رجولك يا بو محمد ورجع من حيث جيت .. ماشي فايدة اذا كان ( مندري ) يدخل بين العسكر ويسرقهم ولا يقدرون يقبضونه .. مصيبه . المهم البركة فيكم لازم نقبض ( مندري) ان جات عرستي وان ماجات . 

وسلامتكم .

*- بقلم/ محمد بن ثعلب الكندي

*- "مندري" باللهجة الحضرمية تعني : لا أعرف

*- العرسه : أنثى الماعز الصغيرة